![]() |
Rais
wa Jamhuri ya Muungano wa Tanzania ,Samia Suluhu Hassan ameagiza Mamlaka za Serikali za Mitaa kusimamia miradi ya maendeleo ili kuendana na thamani
halisi ya kushirikisha wananchi kwenye miradi kwani mamlaka hizo
ni nguzo na kiungo muhimu kati ya wananchi na serikali.
Rais Samia amesema hayo leo Septemba 27,2021 jijini Dodoma katika Mkutano Mkuu Maalum wa Uchaguzi wa Jumuiya ya Mamlaka za Tawala Serikali za Mitaa Tanzania ALAT.
Wakati huo huo, Rais Samia ameagiza kutumia mitandao Zaidi katika ukusanyaji wa mapato na utatuzi wa migogoro ya ardhi na kutekeleza miradi ya maendeleo kwa thamani halisi na kusimamia vyema fungu la asilimia 10 kwa ajili ya mikopo.
Kuhusu suala la ushirikishwaji wa wananchi kwenye miradi ya maendeleo, Rais Samia amesema ni jambo la msingi kwa ajili ya maendeleo huku akiahidi kujenga madarasa 15,000 kote nchini hivyo mwezi januari hakutakuwa na migawanyo ya awamu kuripoti shuleni kwa kigezo cha kukosa vyumba vya madarasa.
Katika kero mbalimbali kwa wananchi ikiwemo migogoro ya miradhi na migogoro ya ardhi ,Rais Samia amewataka viongozi serikali za mitaa kutenda haki na kuacha mivutano kwa viongozi serikali za mitaa ikiwemo madiwani,wakurugenzi na wakuu wa wilaya kwani mivutano iliyo mingi ipo kwa maslahi binafsi.
Kwa upande wake Waziri Mkuu wa Jamhuri ya Muungano wa Tanzania Kassim Majaliwa ,amesema kupitia mfumo wa Force Account kumekuwa na uaminifu mkubwa katika halmashauri kwenye utekelezaji miradi ya maendeleo.
Naye Spika wa Bunge la Jamhuri wa Muungano wa Tanzania Job Ndugai amesema suala la utengaji wa fedha za maendeleo kwa kila halmashauri ni muhimu kwa mujibu wa kanuni na taratibu ambapo kwa upande wa halmashauri ni asilimia 40 na manispaa na majiji kwa asilimia 60.
Waziri wa Nchi ,Ofisi ya Rais,Tawala za Mikoa na Serikali za Mitaa TAMISEMI Ummy Mwalimu amesema maamuzi ya serikali kuanza kulipa posho madiwani limepokelewa vyema kwani imerudisha hadhi na heshima huku akiwataka viongozi wote kusimamia vyema miradi ya maendeleo ambapo hadi sasa halmashauri zimeshapokea Tsh.bilioni 298 kwa ajili ya miradi mbalimbali ya maendeleo.
Mkutano Mkuu Maalum wa ALAT unakwenda sambamba na kauli mbiu isemayo ”Chagua viongozi bora kwa maendeleo endelevu “ambapo uchaguzi wa ALAT unaongozwa na kanuni za kudumu ukihusishwa na wajumbe mbalimbali ikiwemo Mayeya wa majiji na manispaa na wakurugenzi wa halmashauri kote nchini.
MWISHO.

Comments
Post a Comment