Na. Rhoda Simba, Dodoma
HALMASHAURI kuu ya
Chama Cha Mapinduzi CCM ya Taifa (NEC) imekutana leo jijini Dodoma katika
kikao cha kwanza na kumpongeza Rais Samia Suluh Hassan kwa kuivusha nchi
salama katika kipindi cha mpito baada ya kuondokewa na aliyekuwa
Rais wa awamu ya Tano hayati Dkt. John Pombe Magufuli huku Taifa likibaki kuwa
na amani na utulivu.
Katibu wa Itikadi na Uenezi wa CCM Shaka Hamdu Shaka
Akizungumza leo na
waandishi wa habari Katibu wa Itikadi na Uenezi wa CCM Shaka Hamdu Shaka
amesema kikao hicho kimeazimia pongezi hizo wampe kwa maandishi kwa
kumpongeza kwa kupokea madaraka katika kipindi kigumu.
"Wajumbe wa Halmashauri kuu wameona anaenda vizuri katika uongozi wake kwa kuongoza kwa uadilifu na haki kwa kusimamia misingi ya kidemokrasia" amesema Shaka.
Aidha, amesema katika azimio lingine la kikao hicho wajumbe wameona Serikali yake imeendelea kuwajali wananchi wa chini hasa katika bajeti iliyowasilishwa ya 2021/22 kwani imetoa dira inayoonesha serikali inakwenda kupambana na umasikini kwa vitendo.
Katika hatua nyingine Halmashauri kuu imempongeza Rais wa Serikali ya Mapinduzi ya Zanzibar Hussein Ally Mwinyi kwa kusimamia vyema Ilani ya Chama Cha Mapinduzi ( CCM)huko Visiwani Zanzibar
"Kwa upande wa kiuchumi wa blue umeonekana wawekezaji wameendelea kujitokeza huku Amani na utulivu ikizidi kuimarika"amesema Shaka
Shaka amesema Rais Samia Katika kikao hicho amewasisitiza wajumbe wa Halmashauri kuu ya Taifa kwamba bado wanajukumu kubwa la kwenda kusimamia Ilani huku akiwataka kusimamia miradi yote ambayo inatekelezwa na Serikali ili imalizike haraka na kwa wakati.
Pia amewataka kupokea Maelekezo na wasiwe na uoga Wala hofu bila kusita kusema Kama miradi hiyo haitekelezwi ipasavyo hivyo kuhakikisha miradi iliyoanzishwa itatekelezwa kwa wakati na ufanisi.
Kikao hicho Cha Nec kilikuwa Ni kikao Cha kawaida kwa mujibu wa katiba ya Chama ambacho ufanyika kila baada ya miezi sita.
Mwisho.
Comments
Post a Comment