Na Mwandishi Wetu,
VIKUNDI
vilivyopata mikopo kutoka Halmashauri na taasisi nyingine za kifedha
vimeshauriwa kujenga uaminifu katika marejesho ili na wengine waweze kunufaika
na fedha hizo.
Hayo yamebainika jana katika
hafla ya kukabidhi hundi za mikopo awamu ya nne kwa baadhi ya
vikundi vya Halmashauri Wilaya ya Simanjiro mkoani Manyara, jana.
Akizungumza katika hafla hiyo
Meneja wa Benki ya NMB Kanda ya Kati, Nsolo Mlozi alisema benki hiyo
ilikabidhiwa jukumu la kutoa elimu kwa vikundi pamoja na kuwafungulia akaunti
jambo ambalo wamelifanya kwa makini na vikundi vyote walifanikiwa kupata fursa
hiyo.
“Mbali ya elimu ya fedha, NMB
tunashirikiana na halmashauri hii kwa kutoa misaada mingine kwenye jamii hasa
sekta ya elimu, afya na kwenye majanga mbalimbali,” alisema Mlozi.
Alibainisha, NMB imeendelea
kutenga asilimia moja ya faida yake kila mwaka kurudisha kwenye jamii ikiwa ni
juhudi za kuunga mkono Serikali ya Awamu ya Tano chini ya Rais Dk. John
Magufuli.
Aidha, akitoa taarifa ya mikopo
hiyo Mkurungenzi wa Halmashauri ya Simanjiro, Yefred Myenzi alisema jumla ya
fedha zilizokopeshwa kwenye vikundi ni zaidi ya Sh Milioni 244.6 kutoka mapato
yake ya ndani.
“Walionufaika ni jumla ya
wananchi 1412 ndani ya halmashauri hii, ikiwemo wanawake 1074
vijana 372 na walemavua 40. Halmasahuri hii hadi sasa haidawi imeshalipa madeni
yote yakiwemo mikopo benki na wakandarasi waliofanyakazi ya eneo hili,” alisema
Myenzi.
Alibainisha, fedha hizo zinazotolewa
na halmashauri kwa makundi ya wanawake, vijana na walemavu hazina riba wakati
wa kurejesha.
Akizungumza katika hafla hiyo
Mkuu wa Wilaya ya Simanjiro, Mhandisi Zacharia Chaula alivitaka vikundi
vilivyopata fursa ya kupewa mikopo kutoka mfuko wa halmasahuri kuhakikisha
wanarejesha kwa wakati ili wengine waweze kufaidika na mikopo hiyo.
Alisema: “lengo la serikali
kutoa mikopo hiyo kupitia halmashauri ni kuwajengea uwezo wa kiuchumi makundi
maalumu yaliyoorodheshwa kisheria katika mikopo hiyo.”
Alibainisha, mikopo hiyo
inatolewa ili kuwasaidia wananchi kupitia vikundi ili kuibua na kuendeleza
miradi ya maendeleo ambayo itawanufaisha wao na wategemezi wao.
Kwa upande wake Makamu
Mwenyekiti wa Halmashauri ya Simanjiro, Sendeu Laizer alimshukuru Mkurungenzi
wa Halmashauri hiyo na baraza la madiwani kwa kuhakikisha anatenga fedha
hizo kwa kuwahudumia makundi maalumu.
Laizer aliishukuru benki ya NMB
kwa kuwajengea makundi hayo uwezo wa elimu ya kifedha, jambo ambalo
limesaidia kukopa na kuanzisha biashara zenye tija.
Mwisho

Comments
Post a Comment