MOROGORO.
Mkuu wa Mkoa wa
Morogoro Loata Ole Sanare amelazimika kufikia uamuzi wa kuahirisha kikao cha
Baraza maalum la Madiwani cha kujadili taarifa ya Mkaguzi wa hesabu za serikali
katika halmashauri ya wilaya ya Morogoro baada ya kubaini mkanganyiko wa
taarifa katika idara ya Fedha na Maendeleo ya Jamii zinazo onyesha kukinzana na
uhalisia.
Hoja ya kuahirisha
kikao cha baraza la madiwani inakuja baada ya kuibuka utata wa taarifa, katika
idara mbili za Fedha na maendeleo ya jamii, ambapo kwa upande wa idara ya fedha
afisa mapato wa halmashauri hiyo Joseph Komba alitokomea kusiko julikana, mkuu
wake wa idara akisema pamoja na kumsisitiza awepo katika kikao hicho muhimu
ameonekana kukaidi.
Katika idara ya
maendeleo ya jamii kumebainika ukinzani wa taarifa baina ya zile zilizowekwa
katika nyaraka za halmashauri na uhalisia kwa walengwa, ambapo inaonyesha
vikundi vilivyopewa mikopo, hakuna hata kimoja kilichorejesha.
Madiwani wa
halmashauri ya wilaya ya Morogoro wanasema mkanganyiko wa taarifa toka kwa
watendaji na watumishi ni sula lililo zoeleka, wakisema miaka yote halmashauri
inaendeshwa kwa matakwa ya upande mmoja.
Katibu tawala mkoa wa
Morogoro Mhandisi Emmanuel Kalobelo anasema kinacho onekana ni watendaji
kumdharau mkurugenzi wa halmashauri, ambapo hivi karibuni kuna baadhi ya
watumishi walipewa barua za Mashtaka na kuzichana mbele ya mkurugenzi
muda mfupi baada ya kuzipokea.
Mbali na kuagiza
kusimamishwa kazi kwa afisa mapato wa Halmashauri hiyo, mkuu wa mkoa huo Loata
Ole Sanare ameagiza watendaji katika idara hizo mbili kupitia upya taarifa zote
na kuzifanyia marekebisho kisha kuitisha kikao kingine, na kuja na taarifa za
nani atagharamia kikao hicho.
Kikao hicho cha baraza
maalum la madiwani ni mwendelezo wa utekelezaji wa agizo la waziri wa nchi
ofisi ya Rais Tamisemi, kutaka wakuu wa miko kuwa wenyeviti wa baraza hilo
kufuatilia kwa karibu taarifa za mkaguzi na mdhibiti wa hesabu za serikali.
Comments
Post a Comment