Na. Dennis Gondwe, DODOMA
WAZAZI katika Halmashauri ya Jiji la Dodoma wametakiwa
kuwasimamia wanafunzi ili waweze kujisomea kupitia vipindi vinavyoendelea
katika redio zilizopo jijini hapa ili kutimiza malengo yaliyokusudiwa.
| Mkurugenzi wa Jiji, Godwin Kunambi akisisitiza jambo |
Kauli hiyo ilitolewa na Mkurugenzi wa Halmashauri ya Jiji
la Dodoma, Godwin Kunambi wakati akiongea na waandishi wa habari katika ukumbi
wa mikutano wa Halmashauri jana kuhusu mkakati wa Halmashauri ya Jiji kuendelea
kuwafundisha wanafunzi katika kipindi cha mapumziko ya mapambano ya virusi vya
corona.
Mkurugenzi Kunambi alisema kuwa urithi mkubwa kwa watoto
ni elimu na si mali kama baadhi ya watu wanavyofikiria. “Nichukue nafasi hii
kuwaomba wazazi na walezi kuhakikisha Watoto wao ambao ni wanafunzi wanatimiza
wajibu wao kwa kujisomea kupitia vipindi tunavyoendelea navyo vya redio na
mitandao mbalimbali ya kijamii. Hakikisheni mnatembelea tovuti ya Jiji ambayo
ni www.dodomacc.go.tz kwa ajili ya kujifunza”
alisema Kunambi.
Wakati huohuo, Mkurugenzi huyo aliwashauri wazazi na
walezi ambao hawana redio kununua redio ili watoto wapate fursa ya kujifunza
kupitia vipindi vya redio.
Kwa upande wake Afisa Elimu Sekondari wa Halmashauri
ya Jiji la Dodoma, Mwl Upendo Rwenyemamu amesema kuwa katika vipindi
vitakavyofundishwa ni masomo yote kidato cha pili na cha nne. Walimu 26
wabobezi wameandaliwa na ratiba ya vipindi hivyo itawekwa katika tovuti ya
Halmashauri, aliongeza.
Nae Afisa Elimu Msingi wa Jiji la Dodoma, Mwl Joseph Mabeyo
alisema kuwa katika darasa la nne masomo sita yatafundishwa. Kwa wanafunzi wa
darasa la saba, masomo yatakayofundishwa ni matano. Walimu wameandaliwa vizuri
na mada zipo tayari kwa ajili ya wanafunzi” amesema Mwl Mabeyo kwa kujiamini.
MWISHO
Comments
Post a Comment