Na. Jackline Kuwanda, DODOMA
“Nilipata mimba nikiwa na umri wa miaka 15, na
hiyo ilitokana na mimi kuwa naenda stendi kwa ajili ya kuokota mahindi ambayo
tulikuwa tunaenda kuyasaga kwa ajili ya chakula ndipo kaka mmoja alianza kunipa
hela na nikawa naenda kununua mahindi tunayasaga tunakula mwisho wa siku
alinipa ujauzito na aliukataa ujazito. Mama yangu baada ya kuona hayo
alinifukuza nyumbani’’ alisema Julieth.
Julieth Bernad (sio jina lake halisi) ni mzaliwa
wa Wilaya ya Chamwino katika Kata ya Manchali, mkoani Dodoma, anasema aliacha
shule akiwa darasa la kwanza na hiyo ni kutokana na mazingira ya nyumbani kuwa
magumu sana, baba yake na mama yake walitengana pindi yeye hajazaliwa.
Anasema baada ya mama yake kujifungua hali ya
maisha kwao ilikuwa ni ngumu sana na ili wale chakula ilikuwa ni mpaka waendee
kwenye michongoma na kutungua matunda yake ndipo wapate chakula na wakati
mwingine ilikuwa wanaokota mahindi ndipo wale chakula.
“Tukawa tunamaisha mabaya sana, tuliendelea
kuishi na mama yangu hivyo hivyo lakini mwisho wa siku nilipata ujauzito nikiwa
na umri wa miaka 15 na nikazaa mtoto wa kiume” alisema Julieth.
Julieth anaendelea kusema kuwa hali
iliyosababisha yeye kupata ujauzito na kujifungua mtoto wake wa kiume ni
kutokana na hali ngumu ambayo ilikuwa nyumbani kwani hakukuwa na msaada wowote
ule hivyo ili maisha yao yaendelee na wale alikuwa akienda stendi kwaajili ya
kuokota mahindi ambayo walikuwa wakiyasaga kwaajili ya chakula ndipo kaka mmoja
alianza kumpa hela kwaajili ya kununua mahindi, hapo ndipo mahusiano yalipoanzia
na huyo ndiye alikuwa kama msaada kwake mwisho wa siku alijikuta ameshika
ujauzito akiwa na umri mdogo.
Anasema baada ya yule kaka kumpa ujazito
aliamuacha na hakujua ni kwaajili gani yule kaka amemuacha. “Aliniacha tu
sijui aliona kwamba akinitunza atafanyaje kwa hiyo mimi sikuelewa inakuwaje
baada ya yeye kuniacha na kwa sasa yuko mjini’’ alisema Julieth.
Anasema wazazi wa mwanaume walikuwa wakitambua
kuwa kijana wao amenipa ujauzito na walikuwa wakinisaidia pale ninapokuwa na
shida licha ya kuwa kijana wao aliukataa ujauzito.
“Anaitwa Yohana Yusuph ni mkazi wa hapa Chalinze
lakini kwa sasa yuko mjini yeye alikuwa hafanyi kazi yeyote ile na
hakuwahi kuniahidi kunioa’’ aliongeza Julieth.
Julieth anaeleza kwamba baada ya kijana huyo
kukataa ujauzito alindelea na maisha yake wakati mwingine alikuwa akiuza
maandazi lakini mama yake mzazi hakufurahishwa na hali ile ya yeye kushika
ujazito aliamua kumfukuza nyumbani na aliendelea na biashara zake za kuuza
maandazi, sambusa walau kidogo akawa anapata chakula.
“Wakati mama ananifukuza nilikuwa naujauzito
nilikuwa bado sijajifungua na baadaye watu walimshauri nikarudi tena
nyumbani hatimaye nikajifungua mtoto wangu lakini ilikuwa nikwa upasuaji kwa
sababu umri wangu ulikuwa bado ni mdogo’’ alisema Julieth.
Anasema alipojifungua ndipo maisha yakawa
magumu zaidi, mama yake alinifukuza tena na mtoto wake. Dada yake alimpatia
nyumba akawa anaisha yeye pamoja na mtoto wake.
Julieth ni miongoni mwa watoto ambao wako
katika mradi wa SAUTI yangu unaotekelezwa na shirika la utetezi wa
wanawake na watoto la Women wake up (WOWAP) ambalo limedhamiria kuondosha
vitendo vya ukatili kwa watoto. Anasema shirika hilo limewasaidia kwa kiasi kikubwa, ameweza
kujifunza kushona cherehani na anaendelea vizuri huku akielezea sababu
inayopelea watoto wa kike ambao wako katika umri mdogo kuzaa mapema.
Nasra Suleiman ni Mratibu mradi wa SAUTI yangu
unaotekelezwa na shirika la WOWAP, yeye anasema sababu inayopelekea watoto
kupata mimba katika umri mdogo ni kutokana na hali duni za maisha ambazo watoto
wamekuwa wakikutana nazo hivyo, hali hizo hupelekea watoto kutafuta namna ya
kuweza kujikimu matokeo yake wanajikuta wanajiingiza katika vitendo ambavyo
vinawasababishia madhara ikiwemo kushika ujauzito.
Lakini pia Nasra anasema uelewa mdogo wa hizo
familia nao pia unasababisha kwa sababu wamekuwa na mtazamo kwamba mtoto wa
kike bado anatakiwa kukaa nyumbani na kushindwa kumpa kipaumbe.
Ladislaus Loboto ni Mtendaji wa Kijiji
Mnchali B wilayani Chamwino anasema katika upatikanaji wa mimba na ndoa za
utotoni hali hiyo imejitokeza sana katika eneo lao na sababu kubwa ni
kuwa na kipato duni.
“Hicho ndicho kinachosababisha watoto
wanajiingiza katika vitendo ambavyo si vizuri, anaweza kupata shida yeyote ya
chakula au hata mahitaji mengine muhimu hivyo anaweza kukubali kufanya ngono
hata kwa shilingi mia tano” alisema Loboto.
Mradi wa SAUTI yangu ulianzishwa kutokana na
maamuzi ya umoja wa mataifa wa kutokomeza ukatili dhidi ya watoto kama
ilivyoelekezwa katika malengo ya maendeleo endelevu na kutoka katika wito
wa uwajibikaji kwenye muktadha wa ajenda ya maendeleo endelevu kufikia mwaka
2030.
=30=
Comments
Post a Comment